Mikiki mikiki ya ligi kuu ya NBC inaendelea leo ambapo mabingwa watetezi wa ligi hiyo Yanga watashuka uwanja wa KMC Complex kuikabili Singida BS katika mchezo unaotarajiwa kuwa na upinzani mkali.
Wananchi wataingia kwenye mchezo huo huku wakifahamu wanahitaji matokeo ya aina moja tu, ushindi ili kurejea kileleni mwa msimamo wa ligi.
Ndio! hakuna tena nafasi ya kufanya makosa, njia pekee ya Yanga kutetea taji la ligi kuu ni kushinda kila mchezo unaokuja mbele.
Hautakuwa mchezo mwepesi kwani hata Singida BS nao wako kwenye vita ya kuwania nafasi nne za juu ili washiriki michuano ya CAF msimu ujao.
Ikumbukwe Singida BS tayari wametupwa nje katika michuano ya kombe la Shirikisho (CRDB) hivyo nafasi pekee iliyobaki kwao ni ligi kuu.
Yanga imepata muda wa kutosha kujiandaa na mchezo huo hivyo matarajio ya mashabiki ni kuona timu yao ikichukua alama tatu katika mchezo huo mgumu.
Wananchi watashuka dimba la KMC Complex wakiwa na kikosi kamili kuikabili Singida BS katika mchezo ambao haitashangaza kuona mashabiki wa Simba wakijitokeza kwa wingi kuwaunga mkono Singida BS wakiamini matokeo mazuri kwa Singida BS ni faida kwao pia.
