Meneja wa Habari na Mawasiliano wa Klabu ya Yanga, Ali Kamwe ameendelea kuibua mjadala kuhusu tuzo ya Klabu Bora ya Mwaka 2025 iliyotolewa na Baraza la Michezo la Taifa kwa Simba SC.
Kamwe amehoji vigezo vilivyotumika kumpata mshindi wa tuzo hiyo, hasa ikielezwa kuwa sababu kubwa ya Simba kushinda ni kufika fainali ya Kombe la Shirikisho Afrika (CAF Confederation Cup).
Kupitia ukurasa wake wa mtandao wa kijamii, Kamwe alikumbusha namna mwaka 2023 Yanga ilivyotwaa tuzo hiyo kwa kuzingatia mafanikio kadhaa makubwa yaliyopatikana ndani na nje ya nchi.
Kwa mujibu wa Kamwe, mwaka huo Yanga ilipewa tuzo kutokana na:
- Kufika Fainali ya Kombe la Shirikisho Afrika (CAFCC)
- Kutwaa Ubingwa wa Ligi Kuu Tanzania Bara
- Kushinda Kombe la Shirikisho la Azam
Kamwe ameonyesha kushangazwa na kile alichodai kuwa ni mabadiliko ya ghafla ya vigezo vya utoaji wa tuzo hizo.
“Mwaka 2023 sababu zilielezwa wazi kabisa mbele ya wadau wote. Leo tunaambiwa hatuna elimu na hatujui vigezo,” alihoji Kamwe.
Aidha, Kamwe amesema hali hiyo inaonyesha kuwa mafanikio ya ndani kama ubingwa wa ligi na makombe ya nyumbani hayapewi uzito mkubwa mbele ya mafanikio ya kufika hatua za mwisho katika michuano ya kimataifa.
Kwa mtazamo wake, ujumbe unaotolewa na BMT ni kwamba hata timu ikitwaa makombe mengi ya ndani, bado hayana thamani kubwa mbele ya timu iliyofika fainali ya mashindano ya CAF.
Msimu uliopita Yanga ilitwaa mataji yote ya ndani yaani Ngao ya Jamii, Ligi Kuu, kombe la Mapinduzi, kombe la Muungano na kombe la CRDB lakini mataji hayo hayajatosha kwa Wananchi kushinda tuzo hiyo mbele ya watani zao Simba waliomaliza msimu bilaa taji lolote zaidi ya kucheza fainali ya CAFCC
