Mabingwa watetezi ligi kuu ya NBC Yanga wameendelea kujiimarisha kileleni mwa msimamo wa ligi baada ya kuichapa Coastal Union mabao 3-0 katika mchezo uliopigwa uwanja wa KMC Complex.
Wananchi walionyesha dhamira ya kuzihitaji alama tatu mapema tu Allan Okello akifunga bao la kwanza dakika ya 18 akimalizia kazi nzuri ya Prince Dube.
Licha ya kufungwa bao la mapema Coastal Union walihimili mikiki mikiki ya Wananchi na kwenda mapumziko wakiwa nyuma kwa bao 1-0.
Kipindi cha pili Yanga ilirejea na kasi ya kusaka bao la pili huku Coastal Union nao wakiinuka kusaka bao la kusawazisha.
Hata hivyo ni Yanga iliyoongeza bao la pili kupitia kwa Okello kwa mara ya pili dakika ya 62 akipiga shuti kali akimalizia mpira wa krosi kutoka kwa Pacome.
Bao la tatu liliwekwa kimiani na Maxi Nzengeli dakika ya 75 pasi ikitoka kwa Okello ambaye aliondoka na tuzo ya nyota wa mchezo baada ya kuhusika kwenye mabao yote matatu.
Ushindi huo unaifanya Yanga ifikishe alama 54 sasa ikiongoza ligi kwa tofauti ya alama nane.
Aidha msimu huu Yanga sasa imefikisha mabao 50 huku ikiwa imeruhusu mabao matano.
