Mlinda lango wa Yanga Aboutwalib Mshery amesema licha ya kukabiliwa na ratiba ngumu ya kucheza mechi mfululizo, wachezaji wataendelea kupambana ili kuhakikisha wanafikia malengo ya kutetea taji la ligi kuu.
Kesho Jumamosi Yanga itakuwa uwanja wa KMC Complex kumenyana na Coastal Union ikiwa ni siku tatu baada ya mchezo dhidi ya KMC ambao Wananchi waliibuka na ushindi wa bao 1-0.
Mshery amesema wanaendelea kujiimarisha chini ya makocha wao huku wakiwa na matumaini ya kufanya vyema katika mechi zilizobaki.
“Ratiba imekuwa ngumu. Mechi zimefuatana sana. Tumekuwa na wakati mzuri licha ya matokeo magumu kwa baadhi ya michezo. Jambo zuri ni kuwa bado tupo kileleni mwa ligi."
"Waalimu waliopo kwa sasa wanatambua nini kinahitajika. Tunaendelea kupokea maagizo na maelekezo yao. Tuna matumaini makubwa ya kufanya vizuri kutokana na mshikamano ambayo upo katika timu yetu”
“Kila mwalimu anayekuja hapa anakuja na mbinu zake. Kwetu Moallin sio mgeni kwa sababu aliwahi kuwapo hapa. Hapa ni nyumbani kwake. Moallin anaifahamu Yanga vizuri sana."
"Hakuna mabadiliko makubwa kwenye timu yetu ambayo yanaweza kumpa wakati mgumu kutimiza majukumu yake kwa sasa. Tunaendelea kufanya kile ambacho anakitaka na tuna imani kubwa kwenye safari hii pamoja nae,” alisema Mshery
