Kupoteza mchezo wa fainali kombe la Muungano dhidi ya Simba ni matokeo yaliyowaumiza sana mashabiki wa Yanga kutokana na upinzani wa asili uliopo baina ya timu hizo.
Matokeo hayo yasingekuwa na maumivu makali kama Yanga ingepoteza dhidi ya timu nyingine na sio Simba.
Lakini ulikuwa mchezo wa fainali ambao lazima mshindi apatikane, wakati huu bahati imekuwa upande wa Simba. Mapema msimu huu Yanga ilitwaa Ngao ya Jamii kwa kuifunga Simba bao 1-0, ndivyo matokeo ya mpira yalivyo.
Jana Yanga ilitawala mchezo kwa muda mwingi hasa kipindi cha kwanza na kuwa na matukio mazuri zaidi ya kufunga kwenye kpindi cha pili.
Tukio moja tu dakika za lala salama kwenye 'extra time' ndilo lililoingharimu Yanga na kupoteza mchezo huo wakifungwa kupitia mkwaju wa penati baada ya Edmund John kumkwatua Clatous Chama katika jitihada za kuondoa mpira eneo la hatari.
Wachezaji wa Yanga walipambana kwa muda wote, wakitengeneza nafasi bora zaidi, unaweza kusema pia bahati haikuwa upande wao.
Kuna dakika nyingine 90 muhimu katika siku tatu zijazo, mchezo wa May 03 dhidi ya Simba unamaana kubwa kwa Yanga katika mkakati wa kutetea taji la ligi kuu kwa msimu wa tano mfululizo.
Yanga inahitaji kushinda mchezo huu sio kulipa kisasi tu, bali pia kujiweka katika nafasi nzuri ya kutetea ubingwa.
Wananchi wanaongoza ligi kwa tofauti ya alama 5 ushindi dhidi ya Simba utaongeza gap hilo na kufikia alama 8. Katika mazingira hayo Yanga itakuwa imewasha taa ya kijani kuelekea ubingwa wa 32.
