Kiungo mshambuliaji wa Yanga Allan Okello amesema litakuwa kosa kubwa kuwadharau wapinzani wao TMA Stars wanaokutana nao kwenye mchezo wa kusaka tiketi ya robo fainali kombe la CRDB ambao utapigwa kesho Jumamosi uwanja wa KMC Complex.
Okello amewataka wachezaji wenzake kuhakikisha wanaendeleza kiwango bora walichoonyesha kwenye michezo iliyopita ya ligi kuu, akiamini wana kila sababu ya kushinda mchezo huo kutokana na ubora wa kikosi chao.
Okello amesema TMA Stars hawana cha kupoteza kwenye mchezo huo lakini itakuwa habari kubwa endapo Yanga itakosa ushindi na kuondoshwa katika michuano hiyo.
"Ndugu zetu hawana cha kupoteza katika mchezo wa kesho. Endapo sisi tutapoteza bila shaka itakwenda kuwa habari kubwa. Ni wajibu wetu wachezaji kubaki kwenye malengo ya msingi."
"Hatupaswi kuwabeza hata kidogo. Mpira wa miguu unahitaji kuwa na heshima kwa kila mpinzani. Nguvu tunayotumia dhidi ya wapinzani wa ligi kuu inapaswa kutumika vile vile ili kuonesha utofauti”
“Nina matumaini makubwa kama tutaendelea na morali ya mchezo uliopita basi tutapata ushindi wa kishindo. Wachezaji tunapaswa kuwa watulivu uwanjani na kufuata maelekezo ya waalimu wetu."
"Tuna wajibu wa kuipigania nembo ya Yanga. Ukifanya kosa moja tu kwenye mchezo wa mtoano inaweza kubadilish historia. Hii sio ligi. Ninawahakikishia wananchi kuwa tutamaliza kila kitu ndani ya dakika 90,” alisema
