Jana wakati Yanga inaelekea kushuka dimba la CCM Kirumba kuikabili Pamba Jiji, yakaonekana mabadiliko eneo la mlinda lango Hussein Masalanga akianza tofauti na wengi walivyotarajia pengine mchezo huo angeanza Aboutwalib Mshery ambaye hata hivyo alipata changamoto iliyomfanya akosekane kabisa huku Semsey kutoka kikosi cha U20 akiwa golikipa wa akiba.
Lakini kazi iliyofanywa na Masalanga langoni iliwafanya Wananchi wasahau kama hiyo ilikuwa mechi yake ya kwanza ya ligi tangu alipotua kwa Wananchi kwa mkopo akitokea Singida BS kwenye usajili wa dirisha dogo.
Baada ya Diarra kukumbana na adhabu ya kufungiwa mechi tatu, wapo walioamini kuwa Yanga ingeyumba eneo la walinda lango, lakini hali imekuwa tofauti.
Katika mechi zote alizokaa langoni Mshery hajaruhusu bao na Masalanga nae katika mechi yake ya kwanza pia hajaruhusu bao.
Unaweza kusema kwa sasa Yanga ina utajiri mkubwa eneo la magolikia, uwepo wa Diarra umekuwa chachu kwa walinda lango wenzake kuendeleza ubora.
Hivyo kwenye lango la Yanga kwa sasa hakuna tofauti akianza Diarra, Mshery au Masalanga! Ni mwendo wa kukusanya clean-sheet tu.
