Baada ya kukosekana tangu mwanzo wa msimu huu, kiungo mkongwe wa Yanga Salum Abubakar 'Sure Boy' jana alirejea kwa mara ya kwanza akipata dakika chache kwenye mchezo wa ligi kuu dhidi ya Tanzania Prisons.
Mchezo huo uliopigwa uwanja wa KMC Complex, uliishuhudia Yanga ikiibuka na ushindi wa mabao 3-0 na kujiimarisha kileleni mwa msimamo wa ligi.
Furaha ya mashabiki wa Yanga haikuwa ushindi tu, urejeo wa Sure Boy uliibua shangwe kubwa wakati alipotambulishwa uwanjani.
Duke Abuya alimkabidhi kitambaa cha unahodha katika kutambua heshima yake ndani ya klabu ya Yanga.
Baada ya dakika 90 za mchezo huo, mashabiki wakaendeleza utamaduni wao kwa 'kumtuza' Sure Boy pamoja na Abuya ambaye nae aling'ara katika mchezo huo.
Kwa muda mrefu mashabiki wa Yanga walitamani kumuona Sure Boy dimbani, hatimaye benchi la ufundi limesikia kilio chao.
Bila shaka wachezaji wengine kama Farid Mussa na Kibwana Shomari nao watapata nafasi katika mechi zijazo.
Baada ya kikao cha tathmini ya mechi za duru ya kwanza, uongozi wa Yanga uliagiza benchi la ufundi kuhakikisha linawatumia wachezaji wote kwa kuzingata mahitaji ya mechi ili kupunguza athari za uchovu na majeruhi kwa wachezaji wanaotumika zaidi.
