Baada ya mapumziko ya takribani wiki mbili, mabingwa watetezi wa ligi kuu ya NBC, Yanga leo wanarejea dimbani wakiwakaribisha Tanzania Prisons katika mchezo utakaopigwa uwanja wa KMC Complex.
Ni zaidi ya dakika 270 zimepita tangu Yanga iliposhinda mchezo wa ligi kuu hivyo ni wazi leo watashuka dimba la KMC Complex wakiwa na morali kubwa ya kusaka ushindi.
Wanakutana na Tanzania Prisons ambayo tangu ujio wa kocha Chadrack Nsajigwa imeimarika zaidi mara ya mwisho timu hizo zikikutana kwenye mchezo uliopigwa uwanja wa Jamhuri mkoani Dodoma na Yanga ikachomoza na ushindi wa bao 1-0 lililofungwa na Depu dakika ya 80.
Tanzania Prisons wako katika nafasi mbaya kwenye msimamo wa ligi hivyo kwao kila mechi ni kama fainali wakati Wananchi wanafahamu vyema kama watakosa alama tatu leo, basi wanaiweka rehani nafasi yao pale juu ya msimamo.
Habari njema kwa Yanga ni kurejea kwa baadhi ya wachezaji waliokuwa majeruhi hasa nyota wa kikosi cha kwanza kama Ibrahim Bacca, Prince Dube na Depu ambao walikosa mechi za mwisho kabla ya mapumziko ya kalenda ya FIFA.
Mtanange huo unatarajiwa kupigwa saa 12:30 jioni ukiwa miongoni mechi tatu za ligi kuu zitakazopigwa leo.
Mashujaa Fc wataumana na Pamba Jiji katika mchezo utakaopigwa saa 10 jioni huku Namungo Fc wakimenyana na JKT Tanzania katika mchezo utakaopigwa saa 3 usiku.
