Mchezo wa ligi kuu ya NBC kati ya Yanga dhidi ya Simba uliopigwa dimba la New Amaan Complex, umemalizika kwa suluhu ya bila kufungana.
Ulikuwa mchezo ambao Yanga itaridhika na alama moja waliyopata kwani Wananchi hawakuwa kwenye ubora uliozoeleka.
Kipindi cha kwanza Simba ilitawala, shukrani kwa mlinda lango Djigui Diarra aliyeokoa michomo miwili ya hatari kabla ya mapumziko.
Yanga ikarejea imara mwanzoni mwa kipindi cha pili Prince Dube na Mudathir Yahya wakikaribia kuifungia Yanga bao.
Hata hivyo kimbinu Yanga haikuonekana kuwa na mipango madhubuti katika kushambulia na pengine kama sio Diarra mambo yangekuwa mabaya siku ya leo.
Ni alama moja muhimu kwa Yanga ambao inawafanya Wananchi waendelee kusalia kileleni mwa msimamo wa ligi wakifikisha alama 29.
