Kocha Mkuu wa Yanga Pedro Goncalves amewapongeza wachezaji wake kwa ushindi wa mabao 3-0 dhidi ya JS Kabylie katika mchezo wa kuhitimisha hatua ya makundi michuano ya ligi ya mabingwa barani Afrika.
Goncalves amesema licha ya vijana wake kutofuzu hatua ya robo fainali, ameridhishwa na kile walichofanya katika michuano hiyo msimu huu akiamini ni mwanzo wa ujenzi timu imara zaidi ambayo itafanya vyema zaidi huko mbeleni.
"Najivunia timu hii, najivunia wachezaji wangu, benchi la ufundi, viongozi na hata mashabiki ambao wamekuwa nasi bega kwa bega katika kila mechi."
"Tunaangalia kile tulichofanya na nini tunapaswa kufanya ili kuhakikisha tunakuwa bora zaidi. Wakati wa maandalizi kuelekea mchezo huu tuliandaa mpango mkakati, wachezaji wangu wametimiza kile walichopaswa kufanya."
"Lakini mwisho wa siku watu watazungumzia tu kuwa hatujaweza kufuzu lakini katika kundi ambalo lina timu tatu kubwa barani Afrika. Binafsi najivunia sana wachezaji wangu kwa kazi nzuri waiyofanya, najivunia sana timu hii."
"Mashabiki wa Yanga na hata mashabiki wengine wa soka Tanzania wanapaswa kujivunia timu hii. Huu ni mpira wa miguu, wanaofanikiwa ni wale ambao wako tayari kushindana. Sisi tuko hapa kushindana na sio kwenye ligi ya mabingwa pekee, tuna jukumu kubwa la kushinda mataji mengine kama ligi kuu na mashindano mengine," alisema Goncalves.
