Klabu ya Young Africans (Yanga SC) inatarajiwa kutangaza rasmi kampuni itakayoshinda zabuni ya ujenzi wa uwanja wake mpya uliopangwa kujengwa eneo la Jangwani, Dar es Salaam, siku ya Jumamosi Januari 31, 2026.
Tangazo hilo linatarajiwa kufanywa mara baada ya mkutano maalum wa Kamati ya Utendaji ya klabu hiyo, ambao umeandaliwa mahsusi kujadili ajenda moja tu, ujenzi wa uwanja wa Yanga.
Hayo yameelezwa na Meneja wa Habari na Mawasiliano wa klabu hiyo, Ali Kamwe, aliyesema kuwa baada ya kikao hicho, jina la mzabuni litatajwa hadharani.
“Mkutano wa Kamati ya Utendaji utajadili kwa kina suala la uwanja wa klabu, na mara baada ya kikao kumalizika, tutawatangazia wanachama na mashabiki kampuni iliyochaguliwa kushirikiana na Yanga katika mradi huu mkubwa,” alisema Kamwe.
Hatua hiyo ni mwendelezo wa mchakato ulioanza wiki chache zilizopita ambapo Yanga ilitangaza rasmi mwito kwa makampuni ya ndani na nje ya nchi kuwasilisha maombi ya zabuni, kwa kuzingatia mpango wa ujenzi wa uwanja uliowekwa wazi na klabu. Makampuni hayo yaliombwa kuonyesha uwezo wa kifedha, uzoefu wa kiufundi na mpango wa utekelezaji wa mradi huo.
Ujenzi wa uwanja wa Yanga Jangwani ni moja ya ndoto kubwa za muda mrefu za wanachama na mashabiki wa klabu hiyo kongwe nchini. Eneo la Jangwani lina historia ya kipekee kwa Yanga, kwani hapo awali klabu ilikuwa na uwanja wake katika eneo hilo.
