Baada ya ushindi mnono wa mabao 6-0 dhidi ya Mashujaa Fc katika mchezo wa ligi kuu jana, kikosi cha Yanga hakina muda wa kupoteza kwani leo wanarejea mazoezini kukamilisha maandalizi kabla ya safari ya Misri.
Alfajiri ya kesho Jumatano Januari 21, Yanga itaondoka nchini kuelekea Misri tayari kwa mchezo wa ligi ya mabingwa dhidi ya Al Ahly.
Mechi hiyo ya raundi ya tatu kundi B, itapigwa Ijumaa Januari 23 katika mji wa Alexandria dimba la Borg El Arab.
Wenyeji Al Ahly wamechagua kupeleka mchezo huo Uwanja wa Borg El Arab uliopo Alexandria ikiwa ni mwendo wa wastani wa saa nne kutoka Cairo kwa usafiri wa treni au basi.
Kocha Mkuu wa Yanga Pedro Goncalves amesema wamejipanga kupata matokeo mazuri dhidi ya Al Ahly licha ya kukiri utakuwa mchezo mgumu.
Al Ahly na Yanga kila moja imekusanya alama nne kundi B baada ya kushinda na kutoka sare mchezo mmoja.
Timu hizo zitachuana katika dakika 90 za kwanza Misri na kurudiana wiki ijayo visiwani Zanzibar.
