Beki Bakari Nondo Mwamnyeto jana amedhihirisha kwa nini kocha wa Taifa Stars Miguel Gamondi alimjumuisha kwenye kikosi chake kinachoshiriki michuano ya Afcon 2025 inayoendelea huko Morocco.
Licha ya kupoteza mchezo wa kwanza kundi C Tanzania ikifungwa mabao 2-1 dhidi ya Nigeria, Mwamnyeto akishirikiana vyema na Ibrahim Bacca na nyota wengine, walifanya kazi nzuri sana kwenye safu ya ulinzi.
Katika mchezo huo, Gamondi aliamua kuanza na pacha ya Mwamnyeto na Ibrahim Bacca eneo la mabeki wa kati huku Dickson Job akiingia kipindi cha pili akitumika kama mlinzi wa kulia.
Mshambuliaji hatari wa Nigeria Victor Osimhen pengine hatawasahau vitasa hao wa Yanga kwani walihakikisha hafungi kwenye mchezo huo.
Mwamnyeto ameendelea kudhihirisha ni beki imara wa kati akilinda kiwango chake kwa muda mrefu licha ya kutopata nafasi ya kucheza mara kwa mara Yanga.
Mwamnyeto ni kiongozi awapo uwanjani. Ni mwepesi kwenye matukio ya hatari na pia ni mwepesi kufuta makosa yanayojitokeza katika safu ya ulinzi.
