Kikosi cha Yanga leo kitahitimisha mazoezi na wachezaji kurejea makwao kuungana na familia zao kwa ajili ya sikukuu ya Christmas.
Meneja wa Habari na Mawasiliano wa Yanga Ali Kamwe amesema wachezaji watakuwa na mapumziko ya wiki moja ambapo watarejea tena mazoezini Disemba 28 kuendelea na maandalizi ya ratiba ya mechi zitakazofuata.
"Tumekuwa na wiki nzima ya mazoezi wachezaji wanakwenda kwenye 'break' nyingine ili kutoa nafasi kwa wachezaji kwenda kusherehekea sikukuu ya Christmas karibu na familia zao".
"Tarehe 28 wachezaji wataripoti tena kambini ambapo wakirudi tunaanza maandalizi na mchakamchaka kwa ajili ya mechi za ligi kuu ya mashindano mengine," alisema Kamwe.
Yanga ni miongoni mwa timu nane ambazo zimethibitisha kushiriki michuano ya kombe la Mapinduzi inayotarajiwa kuanza Disemba 29.
Hata hivyo huenda kocha mkuu wa Yanga Pedro Goncalves akatumia wachezaji wachache kutoka kikosi cha kwanza akiwaongezea wengine kutoka timu ya vijana.
