Baada ya kung'ara katika mechi mbili za ligi kuu dhidi ya Fountain Gate na Coastal Union, klabu ya Singida Black Stars imeanza mchakato wa kumrejesha beki wa kati Frank Assink ambaye anaitumikia Yanga kwa mkopo, imefahamika.
Assink alitua Yanga kwa mkopo katika dirisha lililopita siku chache kabla ya dirisha hilo kufungwa akichukua nafasi ya Yao Kouassi ambaye hakuwa tayari kurejea uwanjani baada ya kufanyiwa upasuaji.
Inaelezwa mkufunzi wa Singida BS Miguel Gamondi amewaagiza mabosi wa timu hiyo kumrejesha kikosini ili kuimarisha safu yake ya ulinzi ambayo kwa mechi za karibuni imeonekana kusuasua.
Hata hivyo ni wazi Yanga itapambana kumbakisha Assink ambaye alinza msimu taratibu lakini kwa sasa ameonekana kumshawishi kocha Pedro Goncalves ambaye alimtumia kwa dakika zote 180 kwenye mechi mbili zilizopita.
Baada ya michuano ya Afcon 2025 kuhitimishwa huko Morocco mwishoni mwa mwezi ujao, kutakuwa na mfululizo wa mechi katika mashindano yote kwani msimu utapaswa kumalizika katika kipindi cha miezi minne ili kuepusha muingiliano na michuano ya kombe la Dunia itakayoanza Juni 2026
Upana wa kikosi ndio utakaoamua hatma ya kufanya vyema katika mashindano yote
