Wananchi Yanga wako mkoani Dodoma ambapo leo majira ya saa moja usiku watashuka uwanja wa Jamhuri kuikabili Coastal Union katika mwendelezo wa ligi kuu ya NBC.
Ni mchezo mwingine muhimu kwa Yanga kuwania alama tatu mbele ya Wagosi wa Kaya ambao ndio wenyeji wa mchezo huo.
Coastal Union wamehamisha makazi yao kwa muda kutoka jijini Tanga hadi mkoani Dodoma baada uwanja wao wa Mkwakwani kufungiwa.
Mechi inayozikutanisha Coastal Union na Yanga haijawahi kuwa nyepesi. Mkufunzi wa Yanga Pedro Goncalves amekiri kuwa kwa historia na rekodi ya mechi za karibuni, vijana wake leo wanapaswa kuwa katika ubora ili kuibuka na ushindi.
Kocha huyo raia wa Ureno tayari ameiongoza Yanga katika mechi tatu za ligi na kuondoka na alama 9, hivyo leo atakuwa akisaka ushindi wa nne na kuihakikishia Yanga kusalia katika nafasi za juu kwenye msimamo wakati ligi ikisimama kwa mwezi mzima kupisha michuano ya Afcon 2025.
Yanga ilitua Dodoma mapema jana na jioni kikosi kikapata nafasi ya kukamilisha maandalizi katika dimba la Jamhuri, Wananchi wakiwa na ari na morali kubwa kuelekea mchezo huo.
Huu utakuwa mchezo wa mwisho kwa Yanga mwaka huu 2025 kwani baada ya mchezo huu ligi itakwenda kusimama kupisha michuano ya Afcon 2025 inayofanyika Morocco.
