Kikosi cha Yanga kilitua Algeria jana na leo watandelea na mazoezi nchini humo kuelekea mchezo wa pili wa hatua ya makundi CAFCL dhidi ya JS Kabylie ambao utapigwa keshokutwa Ijumaa, Novemba 28.
Hata hivyo baada ya kutua uwanja wa ndege jana, Wananchi walikutana na tukio la aina yake ambapo walilazimika kusubiri kwa takribani masaa matatu baada ya mizigo yao kuzuiwa na mamlaka.
Yanga ambayo ilitua muda mmoja na klabu ya Mamelodi Sundowns iliyo nchini humo kumenyana na MC Alger katika mchezo mwingine wa ligi ya mabingwa, walisubiri mizigo yao hadi pale ilipoachiwa.
Hii ni mbinu inayotumiwa sana miongoni mwa timu kutoka Afrika ya Kaskazini kuwachosha wachezaji kwa kuwaweka uwanja wa ndege muda mrefu.
Baada ya kupata mizigo yao, Yanga ilielekea hotelini na vijana wa kocha Pedro Goncalves hawakuwa na muda wa kupoteza kwani walianza program ya mazoezi ya 'recovery' na leo itakuwa siku ya kwanza ya mazoezi kamili.
