Burudani inarejea kwa Wananchi uwanja wa KMC Complex uliopo Mwenge jijini Dar, wakati mabingwa wa nchi Yanga wakiwakabili Mtibwa Sugar katika mechi ya Ligi Kuu Bara.
Baada ya kucheza mechi yake ya kwanza nyumbani dhidi ya Pamba Jiji katika uwanja wa Benjamin Mkapa, Yanga imerejea tena KMC Complex, dimba la Mkapa likisitishwa matumizi kwa mechi za ndani.
Yanga ina historia ya kibabe hapo KMC Complex hivyo urejeo wao umepokelewa kwa furaha na mashabiki.
Msimu uliopita baada ya kupoteza mechi mbili katika dimba la Azam Complex, Yanga ikahamia KMC Complex ambapo walishinda mechi zote walizocheza katika uwanja huo
Yanga inaingia uwanjani leo ikiwa tayari imecheza mechi mbili za ligi msimu huu na kukusanya pointi nne kufuatia ushindi wa mabao 3-0 dhidi ya Pamba Jiji na matokeo ya 0-0 dhidi ya Mbeya City.
Rekodi zinaonyesha katika mechi kumi za Ligi Kuu zilizopita dhidi ya Mtibwa Sugar, Yanga imeshinda tisa na sare moja. Mara ya mwisho Yanga kupoteza mechi ya Ligi Kuu dhidi ya Mtibwa Sugar ilikuwa Aprili 17, 2019. Katika ushindi wa mechi hizo tisa, nane ni mfululizo.
