Jana klabu ya Yanga ilimtangaza Patrick Mabedi kuwa kocha msaidizi akiungana na Romain Folz katika benchi la ufundi la mabingwa hao wa soka Tanzania Bara. Ikumbukwe Yanga tayari ilikuwa na kocha msaidizi Manu Rodriguez raia wa Hispania.
Meneja wa Habari na Mawasiliano Ali Kamwe amesema ujio wa Mabedi umefanikishwa baada ya ombi la Manu ambaye aliomba kuondoka baada ya kupata changamoto za kiafya
Kamwe amesema baada ya majadiliano baina yake na uongozi, ombi lake limekubaliwa na ndipo mchakato wa kumpata mbadala wake ukaanza
"Ni kweli Manu aliomba apewe ruhusa arejee kwao (Hispania) kushughulikia changamoto za kiafya. Baada ya ombi lake kuridhiwa uongozi ulianza mchakato wa kumpata mbadala wake ambaye ni rasmi sasa ametangazwa kocha Patrick Mabedi"
"Katika kipindi cha siku mbili hizi, Manu atarejea nchini kukamilisha taratibu za kiofisi na hapo tutakuwa tumeachana nae rasmi," alisema Kamwe
Baada ya kutambulishwa jana, Mabedi alianza majukumu yake akiungana na kocha mkuu Romain Folz ambaye sasa atapata msaada mkubwa kutoka kwa kocha huyo raia wa Zimbabwe
Mabedi ana uzoefu mkubwa wa soka la Afrika, amecheza na baadae kufundisha kazi yake ya mwisho kabla ya kujiunga na Yanga akiwa kocha wa timu ya Taifa ya Malawi
