Kiungo wa Yanga, Aziz Andabwile, ameibuka kama moja ya nyota wanaokipa moto kikosi cha kocha Romain Folz msimu huu, akifichua siri ya mafanikio yake ni kujitoa, kushirikiana na wenzake pamoja na kufuata maelekezo ya mwalimu.
Andabwile amesema falsafa yake ni rahisi, anatimiza majukumu yake kwa kuzingatia maelekezo ya mwlimu na pia anashirikiana na wachezaji wenzake
“Kikubwa ni kutimiza majukumu yangu, lakini sifanyi peke yangu. Ushirikiano na wenzangu na kufuata maelekezo ya kocha ni msingi wa mafanikio ya Yanga. Kiu ya kila mmoja ni kutoa mchango wake,” alisema
Katika michezo minne ya mashindano ambayo Yanga imecheza msimu huu, Andabwile ameshuka dimbani mara tatu akicheza dakika zote 90, huku mara moja akitokea benchi dhidi ya Pamba Jiji.
Amefunga mabao mawili muhimu dhidi ya Wiliete ya Angola, akitikisa nyavu ugenini na kuhitimisha nyumbani jambo lililowafanya mashabiki wamwone kama shujaa mpya Jangwani.
Yanga ilianza kampeni zake kwa ushindi wa 1-0 dhidi ya Simba, ikashinda 3-0 dhidi ya Wiliete ugenini, na kisha kufunga safari ya marudiano jijini Dar es Salaam kwa ushindi wa 2-0. Katika michezo hiyo, Andabwile aliendeleza kiwango cha juu.
Msimu uliopita haukuwa mzuri kwake. Andabwile alipata nafasi finyu chini ya makocha watatu waliopita (Miguel Gamondi, Sead Ramovic na Miloud Hamdi), akicheza mechi tano pekee na dakika 125 bila kufunga wala kusaidia bao.
Lakini chini ya Folz, amebadilika na kujipanga upya, akiashiria kuwa huu unaweza kuwa msimu wake wa kuthibitisha uwezo mkubwa alionao.
