Kuonyesha kuwa amepania kuwapa burudani mashabiki wa Yanga kwenye kilele cha wiki ya Mwananchi Ijumaa Septemba 12, kiungo mshambuliaji Celestin Ecua aliondoka kambi ya timu ya Taifa ya Chad baada ya mchezo dhidi Ghana
Juzi Chad walicheza dhidi ya Madagascar wakikubali kipigo cha mabao 3-1 lakini Ecua hakuwa sehemu ya mchezo huo baada ya kuondoka kambini mapema
Taarifa kutoka ndani ya uongozi wa Yanga, zimebainisha kuwa Ecua aliwapigia simu mabosi wa timu hiyo akiwaambia anataka kuwahi Dar kutoka kambi ya timu ya taifa ili apate maandalizi kabambe kuelekea Tamasha la Wiki ya Mwananchi na mchezo wa Ngao ya Jamii.
Ecua aliwaambia mabosi wa Yanga, kama Chad itachelewa kumtumia tiketi ya ndege basi, klabu yake ikae tayari kumtafutia haraka kwani anataka kuwahi nchini.
“Ecua amepiga simu anasema amemwomba meneja wa timu ya taifa lake ahakikishe anaondoka Madagascar mara baada ya mchezo kumalizika, wakamwambia sawa,” kilisema chanzo hicho.
“Licha ya jibu hilo, Ecua akaona atupigie ili tujiandae kama Chad wakichelewa kumtengenezea tiketi hiyo, sisi huku tumfanyie wepesi kumpa tiketi ya kumtoa kule haraka ili awahi Tamasha la Wiki ya Mwananchi," kilieleza chanzo
Ecua aliitumikia Chad kwenye mchezo dhidi ya Ghana akifunga bao la kusawazisha katika mchezo huo uliomalizika kwa matokeo ya sare ya bao 1-1
Huo ulikuwa mchezo wake wa kwanza kuitumikia Chad tangu alipobadili uraia wake kutoka Ivory Coast
Wachezaji wote waliokuwa katika majukumu ya timu za Taifa wanatarajiwa kuripoti kambini kuanzia leo siku mbili kabla siku ya Tamasha
