Ijumaa ya Septemba 12 2025 ndio kilele cha Wiki ya Mwananchi, tukio kubwa la burudani ukanda wa Afrika Mashariki na kati likifanywa na klabu ya Yanga
Hili ni tukio la kukaribisha msimu mpya ambapo maefu ya Wanayanga watakutana uwanja wa Benjamin Mkapa na wengine kulishuhudia katika runinga zao
Lakini mwaka huu tukio hilo linafanyika Ijumaa na sio siku za mwisho wa wiki yaani Jumamosi au Jumapili kama ilivyozoeleka
Meneja wa Habari na Mawasiliano wa Yanga Ali Kamwe amefichua kuwa hata kuipata tarehe 12 haikuwa rahisi kutokana na changamoto ya ratiba
“Tayari klabu imeshatangaza tarehe ya Kilele cha Wiki ya Mwananchi ambayo ni tarehe 12/9/2025, wengi wenu mmekuwa mkijiuliza kwanini Tamasha hili linafanyika siku ya Ijumaa na siyo jumamosi au jumapili kama ilivyozoeleka?"
"Niwaambie tu ndugu zangu, hawa viongozi wetu wamepambana sana mpaka tamasha hili kuwepo msimu huu kwa sababu ratiba za mechi za kalenda ya FIFA zimebana sana"
"Kama tungepanga tarehe nyingine basi tungewakosa wachezaji wetu wengi ambao wameitwa kwenye timu zao za timu za Taifa. Mbali na hapo kuna ratiba ya Ngao ya Jamii na Ligi, hivyo tusingepanga tarehe 12 basi tungekuwa na wakati mgumu kuipata burudani hii ya kilele cha Wiki ya Mwananchi,” alisema Kamwe katika mkutano maalum na Wazee, viongozi wa matawi Dar na makundi ya mitandao ya kijamii
