Kiungo kinda Abdulnassir Mohammed 'Casemiro' ni miongoni mwa sajili zilizofanywa na Yanga katika dirisha hili
Casemiro ambaye aliibuka mchezaji bora chipukizi katika ligi kuu ya Zanzibar msimu uliopita, alitua Yanga akitokea klabu ya Mlandege
Wakati kiungo huyo mkabaji anasajiliwa sambamba na beki Abubakar Nizar Othman 'Ninju', wachezaji hao walitizamwa kama vijana wachanga ambao watahitaji muda kuendelezwa kabla ya kuanza kutumika ipasavyo katika kikosi cha kwanza
Lakini kutokana na kiwango wanachoonyesha kwenye mazoezi yanayoendelea pale uwanja wa KMC Complex, Kocha Mkuu wa Yanga Ramain Folz na benchi lake la ufundi wameshawishika kuwajumuisha katika kikosi cha kwanza na watachuana na wachezaji wengine kuwania nafasi kikosini
Casemiro amekuwa kivutio zaidi hata kwa wachezaji wenzake ambao baadhi wamekiri kuwa nyota huyo ana kipaji kikubwa na pengine atawashangaza wengi pale msimu utakapoanza
"Huyu kijana anajua sana mpira, anajituma na pia anapambana sana, ana uwezo mkubwa wa kupiga pasi na kukimbilia pasi ya pili, akiendelea na nidhamu hii, hiki ni kipaji kikubwa sana," kiungo Maxi Nzengeli aliiambia Yanga TV
Mlinda lango Djigui Diarra nae alionekana kuvutiwa na kinda huyo mara kwa mara akionekana kumuelekeza baadhi ya mambo ya kiufundi ili azidi kuboresha kile anachofanya
