Mshambuliaji wa Yanga Andy Boyeli amesema malengo ya klabu ndio sababu kuu iliyopelekea achague kujiunga na mabingwa hao wa soka Tanzania Bara akitokea klabu ya Shekhukhune ya Afrika Kusini
Boyeli ambaye jina lake la utani ni 'tembo', ameeleza kuvutiwa na mipango ya Yanga na kikubwa zaidi ni timu kubwa Tanzania ikiwa na rekodi ya aina yake
"Kitu muhimu kwangu kilichopelekea kuwa hapa ni malengo ya klabu, lakini pia ukweli ni kwamba ni timu nzuri na inashinda makombe kila msimu. Matamanio ya kila mchezaji ni kushinda makombe"
"Pia niliongea na Rais wa Yanga (Injinia Hersi) nikajisikia amani kuja hapa Tanzania, kwani alinipa ujasiri kuja kufanya hazi hapa," alisema Boyeli
Boyeli amesema baada ya kutua Yanga, lengo lake ni kufunga mabao mengi na kuisaidia tiimu kufikia malengo yake
Mshambuliaji huyo amechagua kuvaa jezi namba 9 ambayo iliwahi kutumiwa na Mcongomani mwenzake Fiston Mayele
"Nitapambana na kuhakikisha nafunga mabao mengi nikiwa hapa, nimechagua kuvaa jezi namba 9. Natambua jezi hii iliwahi kuvaliwa na Fiston Mayele"
"Nimewahi kucheza ligi moja na Mayele kule Congo, yeye alikuwa akicheza AS Vita na mimi RC Rangers. Nimekuwa na mawasiliano naye hata alivyokuwa hapa Yanga"
"Mayele aliniambia Yanga ni timu kubwa zaidi hapa Tanzania na ina mashabiki bora, akanihakikishia nikiwa hapa nitafurahia," alisema Boyeli
Bayeli amewataka mashabiki wa Yanga kuendelea kuisapoti timu na wachezaji wote huku akiwaahidi atapambana na kufanya majukumu yake vyema
