Mshambuliaji wa Yanga na timu ya taifa ya Tanzania, Taifa Stars, Clement Mzize yupo katika hatihati ya kukosa mechi ya ufunguzi ya fainali za michuano ya Kombe la Mataifa ya Afrika, Wachezaji wa ndani (Chan) 2024 dhidi ya Burkina Faso.
Kesho Jumamosi, enyeji Tanzania wataikabili Burkina Faso kuanzia saa 2:00 usiku kwenye Uwanja wa Benjamin Mkapa, jijini Dar es Salaam.
Kocha Mkuu wa Stars, Hemed Suleiman 'Morocco' amesema kuwa Mzize anasumbuliwa na changamoto ya majeruhi
"Timu ipo tayari kwa ajili ya kupambania kombe la Chan 2024 na wachezaji kwa asilimia 90 wapo katika hali nzuri isipokuwa Mzize ambaye hatma yake ipo kwenye mazoezi ya mwisho kabla ya mchezo kesho Jumamosi," amesema Morocco na kuongeza;
"Vipimo vya mwisho juu yake vitatolewa leo Ijumaa na tutajua kama atakuwa sehemu ya kikosi kitakachocheza mechi ya ufunguzi kesho dhidi ya Burkina Faso."
Morocco amesema timu inafanya mazoezi ya mwisho leo saa 1 usiku kwenye viwanja vya Gymkhana hapo ndio watakapokuwa na majibu sahihi ya mshambuliaji huyo kama atakuwa sehemu ya mchezo au ataendelea na matibabu.
