Kuelekea Dabi ya Kariakoo iliyopangwa kupigwa Juni 15, Klabu ya Yanga imeonesha wasiwasi mkubwa juu ya usalama wa mashabiki wake, kufuatia matukio ya hivi karibuni yanayohusisha vitendo vya vurugu kutoka kwa mashabiki wa timu hasimu, Simba SC.
Katika tamko rasmi lililotolewa na uongozi wa Yanga hivi karibuni, klabu hiyo ililaani vikali mashambulizi yaliyofanywa dhidi ya mashabiki wao wakati wa mchezo wa fainali ya Kombe la Shirikisho (CAF Confederation Cup) kati ya Simba na RS Berkane, mchezo uliopigwa visiwani Zanzibar wiki iliyopita.
Yanga imetaka mamlaka husika ikiwemo Shirikisho la Soka Tanzania (TFF) kuchukua hatua madhubuti dhidi ya wahusika wa matukio hayo ambayo imeyataja kuwa ya aibu na yanayokinzana na maadili ya michezo.
Picha na video zilizotapakaa mitandaoni zimeonesha wazi mashabiki wa Yanga wakishambuliwa bila hatia, lakini hadi sasa hakuna tamko lolote kutoka TFF wala Simba SC kulaani au kujibu matukio hayo. Ukimya huo unaongeza hofu na sintofahamu miongoni mwa mashabiki wa Yanga na wanachama wake.
Cha kusikitisha zaidi, matukio ya vurugu yamejirudia hivi karibuni katika mechi ya Ligi Kuu kati ya Simba SC na Singida Black Stars iliyopigwa katika Uwanja wa KMC Complex, ambapo baadhi ya mashabiki wa Simba walihusishwa tena na vitendo vya fujo na uvunjifu wa amani wakiwashambulia wachezaji wa Singida Black Stars
Kutokana na mfululizo huu wa matukio, ni wazi hii ni sababu nyingine ambayo itaifanya Yanga isicheze mchezo namba 184 uliopangwa kupigwa Juni 15 baada ya matukio yaliyojitokeza March 08
Kauli ya Mzee Msumi, Mwenyekiti wa Baraza la Wazee Yanga aliyoitoa juzi imebainisha viashiria vya uvunjifu wa amani ni dhahiri, na kwamba ni muhimu kwa Bodi ya Ligi pamoja na TFF kuchukua hatua za haraka, ikiwa pia ni pomoja na kuweka hadharani ripoti ya uchunguzi baada ya kuahirishwa kwa mechi ya kwanza iliyopaswa kupigwa March 08
Ikumbukwe kuwa mchezo wa awali wa Dabi hiyo uliokuwa umepangwa kufanyika Machi 8 ulishindwa kuchezwa moja ya sababu iliyotajwa na Bodi ya Ligi ikiwa viashiria vya uvunjifu wa amani
