Klabu ya Yanga SC imepokea rasmi mwaliko kutoka kwa klabu ya Rayon Sports ya nchini Rwanda kwa ajili ya kucheza mechi ya kimataifa ya kirafiki.
Mchezo huo maalum unatarajiwa kuchezwa tarehe 15 Juni 2025 katika jiji la Kigali, Rwanda, na unalenga kuimarisha uhusiano wa kiushirikiano baina ya vilabu hivyo viwili vikubwa kutoka Afrika Mashariki.
Kwa mujibu wa taarifa kutoka ndani ya klabu ya Yanga, mchezo huo ni fursa ya kuimarisha uhusiano wa kisoka baina ya Tanzania na Rwanda kupitia vilabu hivi maarufu.
Hata hivyo, tarehe hiyo ya Juni 15 imezua gumzo miongoni mwa wadau wa soka, kwani ni siku ambayo Bodi ya Ligi (TPLB) ilitangaza kuwa itachezwa mechi ya Ligi Kuu Tanzania Bara, namba 184, kati ya Yanga dhidi ya Simba SC, mchezo uliokuwa awali upigwe Machi 8, lakini haukufanyika baada ya Simba 'kuingia mitini'
Yanga ilitangaza msimamo wake wa kutocheza mchezo huo, wakipinga vikali jinsi TPLB ilivyohandle suala hilo, ikiwemo kuahirisha mechi kinyume na kanuni na kutotoa maelezo ya kina kuhusu sababu za kuahirishwa kwake.
Ingawa TPLB iliahidi kufanyika kwa uchunguzi juu ya tukio hilo, hadi sasa hakuna taarifa rasmi ya uchunguzi huo iliyotolewa.
