Kocha Mkuu wa Yanga Miloud Hamdi ameweka wazi malengo ya kuhakikisha kikosi chake kinatwaa mataji mawili yaliyobaki ili kufunga msimu na mataji manne
Licha ya kutofanya vyema katika michuano ya ligi ya mabingwa, Yanga imekuwa na kampeni nzuri katika mashindano ya ndani mpaka sasa
Wananchi kabatini wana mataji mawili ya Ngao ya Jamii na Ligi ya Muungano huku wakiwa kileleni mwa msimamo wa ligi kuu ya NBC na fainali ya michuano ya kombe la CRDB
Hamdi ambaye tangu akabidhiwe majukumu ya kuinoa Yanga hajapoteza mchezo wowote, ameweka wazi kuwa hawahitaji kufanya makosa katika mechi za mwisho kuhitimisha msimu
"Tunafurahi tunakwenda katika mapumziko tukiwa tunaongoza ligi lakini tuko hatua ya fainali ya kombe la CRDB. Niseme tu, bado hatujakamilisha kazi"
"Mechi za mwisho zina umuhimu wa kipekee na hatupaswi kufanya makosa, tunajua hatma ya kutetea ubingwa iko mikononi mwetu kama hatutafanya makosa tutakuwa mabingwa"
"Ilikuwa muhimu pia kushinda mchezo dhidi ya JKT Tanzania na kutinga fainali ya kombe la FA, tuna nafasi nyingine ya kutetea taji la FA kwa mara nyingine," alisema Hamdi
Wachezaji wa Yanga walipewa mapumziko ya muda mfupi na watarejea kambini Juni 1 kwa ajili ya mechi za kuhitimisha msimu
