Jana ilikuwa siku ya hisia kali kwa mashabiki wa Yanga SC – si tu kwa sababu ya ushindi mzuri wa mabao 2-0 dhidi ya JKT Tanzania katika nusu fainali ya Kombe la CRDB, bali pia kwa heshima ya kipekee iliyotolewa kwa kiungo mshambuliaji Stephane Aziz Ki.
Kupitia kitambaa cha unahodha alichovishwa, mashabiki na timu walionesha wazi kuwa huenda huu ukawa ulikuwa mchezo wake wa mwisho ndani ya jezi ya Yanga.
Aziz Ki, ambaye ni mfungaji bora na mchezaji bora wa Ligi Kuu ya NBC msimu uliopita, anatarajiwa kujiunga na miamba wa soka kutoka Morocco, Wydad Athletic Club. Taarifa za makubaliano kati ya Yanga na Wydad zilikuwepo kwa muda mrefu, zikisubiri tu hitimisho la msimu ili kuhalalisha safari ya kiungo huyo kwenda katika hatua nyingine ya mafanikio ya soka lake.
Kwa bahati mbaya, kuchelewa kumalizika kwa Ligi Kuu ya Tanzania Bara kumepelekea kuharakishwa kwa safari ya Aziz Ki, kwani Wydad wanajiandaa kwa michuano ya Kombe la Dunia la Klabu linalotarajiwa kufanyika Marekani kuanzia Juni 15.
Hii ina maana kuwa mechi mbili zilizobakia za Ligi Kuu – zinazotarajiwa kuchezwa Juni 18 na Juni 22 – huenda zikachezwa bila uwepo wa nahodha huyu wa muda.
Katika misimu yake mitatu akiwa na Yanga, Aziz Ki ameacha alama isiyofutika: amekuwa kiungo wa ubunifu, mshambuliaji wa kuaminika, na kiongozi wa kipekee. Ametwaa makombe, ametengeneza mabao, na zaidi ya yote – amekuwa sehemu ya mafanikio ya klabu. Sio rahisi kumpata mchezaji wa aina yake: mwenye utulivu wa kiakili, uimara wa kimwili, na ubunifu wa hali ya juu uwanjani.
Kwa Wananchi, Aziz Ki anaondoka akiwaacha na kumbukumbu tamu – na muhimu zaidi, haondoki akiwa amewabebesha madeni. Kwa kila jasho alilolitoa, kwa kila bao alilofunga, kwa kila pasi ya mwisho aliyotoa, amethibitisha kuwa alikuwa zawadi kubwa kwa klabu na mashabiki wake.
Wakati akielekea Wydad, tunamtakia kila la heri katika safari yake mpya. Bila shaka, rekodi zake Tanzania zitaendelea kuzungumzwa, na pengo lake litahisiwa – si tu na Yanga, bali hata na mashabiki wa soka nchini kwa ujumla.
Asante Aziz Ki – Mwananchi halisi, shujaa wa kihistoria. Safari njema kwenye ukurasa mpya wa ndoto zako!
