Yanga imeendelea kuukaribia ubingwa wa ligi kuu kwa msimu wa nne mfululizo leo wakiichapa Namungo Fc mabao 3-0 katika mchezo uliopigwa uwanja wa KMC Complex
Yanga iliuanza mchezo huo taratibu lakini iliwachukua Wananchi dakika 26 kupata bao la uongozi kupitia kwa Stephane Aziz Ki aliyemalizia pasi murua kutoka kwa Maxi Nzengeli
Dakika nne baadae Yanga ikaongeza bao la pili kupitia kwa Prince Dube aliyemalizia krosi ya chini kutoka kwa Kibwana Shomari
Mabao hayo yaliifanya Yanga iende mapumziko ikiwa na uongozi wa mabao 2-0
Kipindi cha pili Yanga ilirejea ikiwa na kasi zaidi pengine kama isingekuwa mlinda lango Jonathan Nahimana, Namungo wangeondoka na kapu la mabao leo
Bao la tatu liliwekwa kimiani na Maxi Nzengeli aliyekuwa nyota wa mchezo huo akimalizia krosi ya Israel Mwenda aliyeingia kipindi cha pili kuchukua nafasi ya Kibwana
Ni alama tatu muhimu kwa Yanga ambazo zinawafanya wafikishe alama 73 juu ya msimamo sasa wakisalia na mechi mbili tu za kuhitimisha msimu ambazo zitapigwa mwezi ujao
