Baada ya mapumziko ya zaidi ya siku 10, Wananchi leo watashuhudia burudani kutoka kwa timu yao Yanga pale itakapoikabili Coastal Union katika mchezo wa hatua ya 32 bora kombe la Shirikisho la CRDB
Mtanange huo wa kukata na shoka, utapigwa saa 10 jioni katika dimba la KMC Complex
Ni kumbukumbu ya fainali ya misimu mitatu iliyopita timu hizo zilipokutana katika michuano hiyo mkoani Arusha na Yanga kubeba kombe kwa ushindi wa mikwaju ya penati 4-1 baada ya matokeo ya sare ya mabao 3-3
Msimu huu Yanga na Coastal Union tayari zimekutana mara moja katika mchezo wa ligi kuu Yanga ikiibuka na ushindi wa bao 1-0
Ni wazi haitakuwa mechi rahisi, Coastal Union haijawahi kuwa mpinzani mwepesi kila inapokutana na Yanga
Kocha wa Yanga Miloud Hamdi amepata muda wa kutosha kukiandaa kikosi chake ambacho kilipaswa kucheza dhidi ya Simba Jumamosi iliyopita lakini mechi ikaota mbawa katika mazingira ya kutatanisha
Mshindi wa mchezo huo atajihakikishia tiketi ya kutinga hatua ya 16 bora ambapo atachuana na Songea United
