Kiungo mshambuliaji wa Yanga Pacome Zouzoua amewapa pole mashabiki wa timu hiyo baada ya timu yao kushindwa kufuzu robo fainali ya ligi ya mabingwa barani Afrika
Pacome amesema hata wachezaji wameumizwa na matokeo hayo lakini sasa wameweka ahadi kuhakikisha wanatetea mataji yote wanayoshikilia ili kurejea katika michuano hiyo wakiwa imara zaidi msimu ujao
"Kuna wakati unaona ni kama ndoto kukosa kucheza robo fainali, kuna wakati unapata matokeo ambayo yanashtua, hii imewaumiza sana mashabiki wetu na hata sisi wachezaji"
"Haitakuwa nzuri kama tutawaumiza na kukosa makombe ya ndani ambayo tunayashikilia, tutafanya kila linalowezekana kuhakikisha tunatetea makombe yetu yote," alisema Pacome ambaye aliugua malaria siku chache kabla ya mchezo dhidi ya USM Alger lakini akaomba apewe nafasi katika mchezo huo ambao aliingia kipindi cha pili
Wikiendi hii Yanga itaanza safari ya kutetea taji la Kombe la FA itakapoikaribisha Copco kutoka Mwanza, mchezo wa hatua ya 64 Bora utakaocheza Uwanja wa KMC Complex, Dar es Salaam
Baada ya mchezo huo, Februari 1 Yanga itaanza mechi za duru ya pili ligi kuu ya NBC kwa kuikabili Kagera Sugar katika mchezo utakaopigwa dimba la KMC Complex
