Katika moja ya maeneo ambayo uongozi wa Yanga unapaswa kufanyia kazi, ni kutengeneza hofu kwa wapinzani hasa timu inapocheza katika uwanja wa Benjamin Mkapa
Kwa mara nyingine jana Yanga imeshindwa kutumia vyema uwanja wa Benjamin Mkapa kufuzu robo fainali ya ligi ya mabingwa baada ya kulazimishwa suluhu ya bila kufungana dhidi ya MC Alger
Ni mchezo ambao Yanga ilihitaji kushinda ili kufuzu lakini dakika 90 hazikutosha kuwapa Wananchi ushindi katika ardhi yao
Msimu huu Yanga imekusanya alama nne pekee nyumbani, ikishinda 3-1 dhidi ya TP Mazembe na kupoteza 2-0 dhidi ya Al Hilal
Kutotumia vyema uwanja wa nyumbani ni kilio cha Wananchi kwa miaka mingi pengine jambo hili sasa linapaswa kutengenezewa mkakati ili kuhakikisha Yanga inaongeza ufanisi inapocheza nyumbani katika mashindano ya CAF
Kama mechi ya MC Alger jana ingekuwa ni ugenini pengine Yanga ingeweza kushinda! Katika misimu ya karibuni Yanga imejenga tabia ya kufanya vizuri ugenini kuliko nyumbani kulikoni?
Hata katika msimu wa 2022/23 ambao Yanga ilicheza fainali ya kombe la Shirikisho (CAF CC), katika hatua ya mtoano ilishinda mechi zote ugenini lakini ikakosa ushindi nyumbani kwenye mechi ya kwanza ya fainali dhidi ya USM Alger halafu ikashinda mechi ya pili Algeria katika mchezo ambao uligubikwa na figisu za kila aina
Uongozi wa Yanga unapaswa kuona kama hili ni tatizo ambalo linahitaji ufumbuzi wa haraka
Kwa utamaduni soka la Afrika, uwanja wa nyumbani ndio eneo la kujidai ukienda ugenini huko lolote linaweza kutokea
