Mabingwa wa soka Tanzania Bara Yanga leo wako uwanjani huko Mauritania kumenyana na Al Hilal katika mchezo wa raundi ya tano hatua ya makundi ya michuano ya ligi ya mabingwa barani Afrika
Hii ni mechi muhimu kwa Yanga kushinda ili kuweka hai matumaini ya kuwania kufuzu robo fainali ya michuano hiyo
Ni wazi itakuwa mechi ngumu, lakini kwa Yanga hakuna matokeo mengine yanayohitajika zaidi ya ushindi
Kama Yanga itapoteza mchezo huo maana yake itakuwa imekubali kuyaaga mashindano hayo
Akizungumzia hali ya kikosi kuelekea mchezo huo, Meneja wa Habari na Mawasiliano wa Yanga Ali Kamwe alisema wachezaji wote wako tayari kwa mchezo huo, ari na morali ya timu ikiwa juu
"Tumekuwa na maandalizi mazuri hapa Mauritania, niseme tu ukiangalia nyuso za wachezaji, wanakuonyesha dhamira ya kutaka kushinda mchezo huu dhidi ya Al Hilal"
"Kila mmoja anafahamu kama tutakosa ushindi basi tutakuwa tumejiweka katika mazingira magumu ya kufuzu au kuondoshwa katika michuano kama tutapoteza kabisa"
"Tunafahamu ubora wa Al Hilal, tutakwenda kupambana nao kwa dakika zote 90 na kuhakikisha tunapata matokeo ya ushindi," alisema Kamwe
Mchezo huo utapigwa saa 4 usiku kwa saa za Tanzania ambapo huko Mauritania itakuwa saa 1 usiku
Kila la kheri Wananchi....!
