Wawakilishi pekee wa nchi katika mashindano ya Ligi ya Mabingwa Afrika, Yanga Jumamosi wanakabiliwa na mechi ngumu ya ligi ya mabingwa dhidi ya TP Mazembe kutoka Jamhuri ya Kidemokrasi ya Congo (DR Congo), itakayochezwa kwenye Uwanja wa Benjamin Mkapa, Dar es Salaam
Mechi hiyo inaweza kuamua hatma ya Yanga kuvuka kwenda hatua ya robo fainali ya michuano hiyo ya kimataifa
Meneja wa Habari na Mawasliano wa Yanga, Ali Kamwe, alisema wamekaa na wachezaji na kukubaliana mechi ya kesho watacheza kama hakuna mchezo mwingine watakaocheza tena kwa sababu ndio utakuwa daraja la wao kwenda hatua mbele ya michuano hiyo, vinginevyo watakuwa wamejiweka katika hali mbaya
Kamwe alisema wakati wachezaji wakihamasishana 'kufia uwanjani' katika mechi hiyo, amewataka mashabiki wa Yanga kujitokeza kwa wingi kwa ajili ya kuwashangilia na kuwapa hamasa na kuufanya Uwanja wa Benjamin Mkapa uwe kama 'tanuri la moto' kwa wapinzani
Alisema haipendezi kwa klabu kama Yanga ambayo msimu uliopita ilifika hatua ya robo fainali ishike mkia katika kundi kutokana na kuvuna pointi moja pekee baada ya kucheza michezo mitatu
TP Mazembe ilitua nchini mapema jana tayari kwa ajili ya mchezo huo wa raundi ya nne, baada ya kutoka sare ya bao 1-1 mjini Lubumbashi, hapo Desemba 14, mwaka jana
