Kocha Mkuu wa Yanga Sead Ramovic leo anakwenda kukiongoza kikosi chake katika mchezo wa pili wa ligi kuu dhidi ya Mashujaa Fc katika uwanja wa KMC Complex
Ni mechi muhimu kwa Yanga kushinda ili kuhakikisha inapunguza gap la pointi dhidi ya timu zilizo juu yake lengo likiwa kurejea kileleni mwa msimamo
Ramovic anakwenda katika mchezo huo akiwa na kikosi chake imara licha ya kuwa baadhi ya wachezaji wanaweza kukosekana kutokana na sababu mbalimbali
Taarifa rasmi iliyotolewa na Yanga jana ilithibitisha kukosekana kwa Clatous Chama ambaye anauguza jeraha la kiwiko cha mkono
Bila shaka Stephane Aziz Ki leo atarejea katika kikosi cha kwanza baada ya kutoanza mchezo uliopita wa ligi ya mabingwa dhidi ya TP Mazembe
Mlinda lango Djigui Diarra huenda akapumzishwa na Aboubakar khomein kukaa langoni
Diarra alipata majeraha katika mchezo dhidi ya TP Mazembe, kulingana na taarifa iliyotolewa na msemaji wa Yanga, Ali Kamwe, afya yake imeimarika lakini ana asilimia 50 za kucheza kama ilivyo kwa mlinzi wa kushoto Chadrack Boka
Pengine habari njema zaidi kwa mashabiki wa Yanga ni kurejea kwa Clement Mzize katika safu ya ushambuliaji
Mzize alicheza dakika 45 za mechi ya ligi ya mabingwa dhidi ya TP Mazembe na kuonyesha kiwango kizuri
Bila shaka Ramovic leo hatasita kumuanzisha Mzize katika kikosi chake cha kwanza, anaweza kumtumia kama winga au mshambuliaji wa kati
Ramovic hatarajii kufanya mabadiliko makubwa katika kikosi chake, pengine nyota wengi walioanza katika mchezo uliopita dhidi ya TP Mazembe, watatumika leo
Hii ni mechi muhimu kwa Yanga kushinda ili kuendelea kurejesha ari na morali ya timu kabla ya mchezo wa ligi ya mabingwa dhidi ya TP Mazembe utakaopigwa uwanja wa Benjamin Mkapa Januari 03 2025
Mechi hizi nne zinazofuata za ligi kukamilisha duru ya kwanza ni muhimu kwa Yanga kushinda zote. Pia ni maandalizi mazuri kuelekea mchezo dhidi ya Mazembe
