Baada ya kutambulisha usajili wa mlinzi wa pembeni Israel Mwenda, Yanga pia inatarajiwa kufanya maboresho mengine eneo la beki wa kati
Rais wa Yanga Injinia Hersi Said yuko sokoni kusaka beki mwingine wa kati mzawa ili kuwaongezea nguvu Bakari Mwamnyeto, Ibrahim Bacca na Dickson Job
Kwa sasa Yanga inalazimika kuongeza mlinzi mwingine wa kati hasa baada ya eneo hilo kuyumba katika kipindi cha mwezi mmoja uliopita
Baada ya Bacca 'kula umeme' na Job kutumikia adhabu ya kadi tatu za njano, Yanga ililazimika kucheza dhidi ya Tabora United na mlinzi wa kati mmoja tu, Bakari Nondo Mwamnyeto kufuatia Aziz Andabwile ambaye kocha wa zamani wa Yanga Miguel Gamondi alikuwa akimtumia kwa dharura katika safu ya ulinzi kupata majeraha katika mchezo huo
Yanga ililipa gharama ya uhaba wa mabeki wa kati ikizawadiwa kipigo cha mabao 3-1 kutoka kwa Tabora United ukiwa ni mchezo wa pili mfululizo kupoteza kwenye ligi msimu huu baada ya kufungwa na Azam Fc
Mazingira kama hayo yakajitokeza tena katika dakika 10 za mwisho katika mchezo dhidi ya Namungo Fc baada ya Job kupata majeraha na kumlazimu Duke Abuya kumaliza mechi akiwa beki wa kati sambamba na Mwamnyeto
Beki wa Coastal Union na timu ya Taifa ya Tanzania 'Taifa Stars' Lameck Lawi na beki wa Fountain Gate ambaye pia huitumikia timu ya Taifa ya Zanzibar 'Zanzibar Heroes' Laurian Makame ni miongoni mwa majina yanayotajwa kuwa mezani kwa Injinia Hersi
