Nahodha wa Yanga Bakari Nondo Mwamnyeto amewataka mashabiki kujitokeza kwa wingi uwanja wa Benjamin Mkapa hapo kesho katika mchezo wa kwanza hatua ya makundi ligi ya mabingwa barani Afrika dhidi ya Al Hilal
Akizungumza katika Mkutano na Wanahabari kuelekea mchezo huo, Mwamnyeto amesema wamejiandaa kuwapa furaha mashabiki wao kwa kushinda mchezo huo
Baada ya kupoteza mechi mbili mfululizo kwenye ligi kuu ya NBC, Mwamnyeto amewahakikishia Wananchi kuwa mchezo wa kesho utakuwa tofauti, wafike kwa wingi dimba la Mkapa kushuhudia burudani
"Matokeo ya mechi zilizopita ni mechi za Ligi, sasa hivi tunakwenda kwenye Ligi ya Mabingwa Afrika, niwaombe mashabiki waondoe hofu na waje kwa wingi uwanjani. Tusahau yaliopita na kesho tuanze safari nyingine"
"Kwa muda mchache tuliokaa na mwalimu yako mambo ametupa na tumeyaelewa, kesho naamini mtakuja kuona mpira tofauti na ladha ya tofauti kutoka kwetu"
"Tunaelewa mechi itakuwa ngumu, lakini sisi tumejiandaa vizuri na ninaamini tutakwenda kupambana kwa ajili ya timu yetu na mashabiki wetu. Niwaombe mashabiki waje kwa wingi na kutushangilia kwa dakika zote 90 tutakazokuwa tunapambana uwanjani," alisema Mwamnyeto
