Baada ya mapumziko ya mwishoni mwa wiki, kikosi cha Yanga leo kinarejea mazoezini kuendelea na maandalizi ya mchezo wa ligi ya mabingwa dhidi ya Al Hilal utakaopigwa Jumanne, Novemba 26 katika uwanja wa Benjamin Mkapa
Kikosi leo kinarejea mazoezini kikiwa na mabadiliko ya benchi la ufundi ambapo itakuwa siku ya kwanza kazini kwa Kocha Mkuu Sead Ramovic pamoja na kocha msaidizi anayesubiri kutambulishwa sambamba na Abdihamid Moallin aliyekuwa kocha wa KMC ambaye huenda akapewa majukumu mapya ya Mkurugenzi wa ufundi
Kocha aliyesitishiwa mkataba Miguel Gamondi alisimamia mazoezi ya kikosi wiki iliyopita hadi siku ya Alhamisi pale uongozi ulipofikia uamuzi wa kusitisha mkataba wake na kumtangaza Ramovic aliyetua kutoka klabu ya TS Galaxy ya Afrika Kusini
Baada ya kutambulishwa, Ramovic hakuwa na muda wa kupoteza kwani mwishoni mwa wiki alifanya vikao na uongozi pamoja na benchi la ufundi pia akipata nafasi ya kuifahamu Yanga kwa undani ikiwa ni pamoja na kutazama mechi mbalimbali ambazo Yanga imecheza msimu huu
Kocha huyo raia wa Ujerumani atakuwa na wiki moja ya kukiandaa kikosi chake kabla ya mchezo wa ligi ya mabingwa dhidi ya Al Hilal utakaopigwa Jumanne, Novemba 26
Ujio wa kocha mpya unatoa nafasi kwa kila mchezaji kupambania nafasi yake katika kikosi. Haitakuwa ajabu kuona baadhi ya wachezaji ambao walikuwa hawapati nafasi enzi za kocha Gamondi kuwashuhudia wakicheza mbele ya Ramovic
Ramovic anaonekana ni kocha asiye na masihara, ameweka msimamo wake mapema kuwa katika kikosi chake hataki wachezaji wavivu wa mazoezi, walevi na wale wanaopenda 'kujirusha' nyakati za usiku
Ramovic anafundisha soka la Kijerumani ambalo linahitaji nguvu, kasi na 'fitness' ya wachezaji kuwa juu
