Timu ya Taifa ya Tanzania 'Taifa Stars' leo iko 'kibaruani' DR Congo kuumana na wenyeji wao hao katika mchezo wa kuwania kufuzu Afcon 2025 kundi H
Ni dakika 90 muhimu ugenini ambazo zitahitimishwa na dakika nyingine 90 nyumbani wiki ijayo
DR Congo ndio vinara wa kundi H wakiwa na alama sita baada ya kushinda mechi zote mbili huku Tanzania ikishika nafasi ya pili na alama nne baada ya kushinda mchezo mmoja na kulazimishwa sare mchezo mmoja
Tanzania leo inahitaji ushindi au hata matokeo ya sare ugenini na kuhakikisha inatumia vyema uwanja wa nyumbani katika mchezo wa pili utakaopigwa Oktoba 15 jijini Dar es salaam
Kaimu Kocha Mkuu wa Tanzania Hemedi Morocco amesema kikosi chake kiko tayari kwa mchezo huo na wanakwenda kusaka ushindi
Stars ilitua Kinshasa mapema jana na jioni ikafanya mazoezi ya mwisho Stade des Martyrs ambako mchezo huo utapigwa saa 1 usiku
