Yanga yapiga hesabu za kutinga robo fainali CAF CC

Wakati droo ya Makundi ya michuano ya kombe la Shirikisho Barani Afrika ikitarajiwa kufanyika leo jiji la Cairo nchini Misri, klabu ya Yanga inajipanga kufanya vizuri katika michuano hiyo mwaka huu.

Mwaka 2016 Yanga ilitinga hatua ya makundi lakini ilishindwa kufanya vizuri ikimaliza nafasi nne kwenye kundi A baada ya kujikusanyia alama nne.

Mwaka 2016 Yanga ilipangwa kundi A sambamba na TP Mazembe(DRC), Medeama(Ghana) na MO Bejaia(Algeria)

Nahodha wa Yanga Nadir Haroub 'Cannavaro' amesema mwaka huu wamejipanga kuhakikisha wanavuka hatua hiyo ya makundi.

Timu mbili za juu kutoka kila kundi zitatinga robo fainali ya michuano hiyo na kujinyakulia kitita cha zaidi ya Tsh Milioni 800.

“Mwaka 2016 tulifanikiwa kufikia mafanikio haya ya kutinga hatua ya makundi lakini hatukuvuka hapo, safari hii lazima tujipange na kuhakikisha tunajiandaa vyema ili kuvuka hatua hii, hayo yatakuwa mafanikio kwetu,” alisema Cannavaro baada ya Yanga kuwasili kutoka Ethiopia.

Yanga inatarajiwa kuondoka leo mchana kwa usafiri wa Ndege kuelekea mkoani Mbeya kwa ajili ya mchezo wa ligi kuu ya Vodacom dhidi ya Mbeya City