Kocha Mkuu wa Yanga Miguel Gamondi anaamini mshambuliaji Prince Dube atafunga mabao mengi msimu huu kama atazingatia maelekezo anayopatiwa katika kiwanja cha mazoezi
Dube ameanza vyema maisha yake na Yanga akipachika mabao manne, assist mbili katika mechi saba alizowatumikia Wananchi mpaka sasa
Gamondi amesema Dube ni mshambuliaji mwenye uwezo mkubwa akiwa na wastani mzuri wa kupiga mashuti yanayolenga lango
Amesema kuna maelekezo ameendelea kumpatia ili kumfanya awe bora zaidi
"Nimemwambia azingatie mambo mawili. La kwanza kucheza zaidi ndani ya boksi la wapinzani, pili atulize presha, asiwe na haraka katika kuzitumia nafasi ambazo timu inazitengeneza, akifanya hivyo ataweza kuongeza idadi ya mabao kwa kuwa timu ina uwezo wa kutengeneza nafasi nyingi"
"Dube ni mshambuliaji bora mwenye akili nyingi, nguvu na kasi lakini zaidi uwezo wa kulenga (target) ambavyo sio rahisi kwa mshambuliaji kupata vyote hivyo, wengi unaweza kuwakuta wana sifa moja au mbili tu," alisema Gamondi
Dube alitua Yanga katika dirisha lililopita akitokea klabu ya Azam Fc aliyoachana nayo mwezi Machi mwaka huu
