Mabingwa wa soka Tanzania Bara, Yanga wako katika nyakati nzuri sana kutokana na ubora wa kikosi chao
Aidha maboresho ya usajili ambayo yamefanyika katika dirisha hili ni kama kuongeza kachumbari katika chakula ambacho kilikuwa tayari
Wakati Yanga leo ikishuka uwanja wa Benjamin Mkapa kuwakabili watani zao Simba, Wananchi wanakwenda kifua mbele wakiwa na timu bora zaidi
Pengine hii ndio sababu inayowafanya mashabiki wa Yanga wasiwe na hofu kuelekea mchezo huo kulinganisha na watani zao Simba ambao hawana uhakika na timu yao ambayo ina kundi kubwa la wachezaji wageni
Ukiangalia vikosi viwili ambavyo Gamondi alivitumia katika mchezo dhidi ya Red Arrows, chochote anaweza kukitumia leo na wananchi wakaondoka na furaha dimba la Mkapa
Yaani Gamondi anaweza kuwapa nafasi wapinzani wake wachague timu ya kukabiliana nayo na mambo bado yanaweza yakawa magumu upande wao
Lakini hii ni mechi ambayo Gamondi na vijana wake waliisubiri sana kwa hamu. Msimu uliopita Yanga ilikosa Ngao ya Jamii na kupoteza nafasi ya kushinda 'treble'
Yanga ilipoteza mchezo dhidi ya Simba kwa mikwaju ya penati baada ya matokeo ya suluhu ya bila kufungana mkoani Tanga
Hivyo hii ni kama mechi ya kisasi kwa Yanga, Gamondi hayuko tayari kuona timu yake inapoteza mechi dhidi ya Simba kwenye Ngao ya Jamii kwa mara nyingine
Jana katika Mkutano na waandishi wa habari, Gamondi aliweka wazi umuhimu wa mchezo wa leo, alisema anaheshimu mechi za dabi na hivyo watakwenda kucheza mechi hii wakiwa na kikosi chao bora zaidi pamoja na kuchukua tahadhari zote ili kuhakikisha wanashinda
