Kwa aina ya maboresho ya kikosi ambayo Yanga wamefanya katika dirisha hili la usajili, Wananchi watarajie kuona ushindani mkali katika kikosi cha kwanza
Lakini ushindani huo unaweza usihusishe eneo ambalo anacheza Maxi Nzengeli kwani anaonekana msimu huu amerejea akiwa na ari ileile
Juzi katika mchezo wa ufunguzi wa Mpumalanga Premier's International Cup dhidi ya Ausburg, Maxi ni mchezaji pekee ambaye hakufanyiwa mabadiliko katika safu ya ushambuliaji
Wachambuzi wanasema tank la mafuta la Maxi limejaa muda wote, pengine ndio sababu katika mchezo huo aliwahenyesha kwelikweli Wajerumani
Bao pekee la Yanga lililofunga na Jean Baleke lilitokana na krosi ya Maxi ambaye pia alimanusra aifungie Yanga katika kipindi cha kwanza kama sio shuti lake kugonga mwamba
Baada ya mchezo Wajerumani walimfuata Maxi kwenye vyumba vya kubadilishia nguo kumpongeza na kuomba kubadilishana jezi
Kwa hakika Rais wa Yanga Injinia Hersi Said anapaswa kuanza mapema mazungumzo ya kumuongeza mkataba ili kuhakikisha anaendelea kuwa mali ya Wananchi kwa miaka mingi
