Tuombeeni dua - Nadir

Kikosi cha Yanga leo kinatarajiwa kufanya mazoezi ya mwisho kwenye uwanja wa Hawassa kuelekea mchezo wa kusaka tiketi ya kutinga hatua ya makundi kombe la Shirikisho.

Nahodha wa Yanga Nadir Haroub amesema wachezaji wote wako katika hali nzuri tayari kwa mchezo huo.

Akizungumzia hali ya hewa na mji huo, Nadir amesema licha ya hali ya hewa ya baridi lakini haiwezi kuwa kikwazo kwao kutimiza malengo yao ya kutinga makundi.

"Kusema kweli baridi ipo, hali ya hewa ya huku unaweza kufananisha kama mji wa Arusha, lakini ni hali ya hewa nzuri"

Aidha, kuelekea mchezo huo Nadir amesema watacheza kwa tahadhari kubwa kwani wanafahamu uwezo wa wapinzani wao.

"Bado mechi ni ngumu kwa sababu tunacheza na timu nzuri. Lengo letu ni kuhakikisha tunapata bao la ugenini japo hata sare itatuvusha hatua ya makundi, ushindi ndio matokeo tunayohitaji zaidi."

"Nawaomba Watanzania watuombee dua ili tuweze kufanya vizuri. Sisi tuko hapa kuiwakilisha nchi ya Tanzania."