Klabu ya Yanga haitatangaza majina ya wachezaji wanaoachana nao kupitia mitandao ya kijamii
Meneja wa Habari na Mawasiliano wa Yanga Ali Kamwe amesema klabu inathamini mchango wa wachezaji hao pamoja na kuwa umefika wakati wa kuachana nao
Kamwe amesema katika utafiti aliofanya kama kiongozi, amebaini taarifa za wachezaji hao zinapowekwa mitandaoni hupokelewa kwa hisia tofauti jambo ambalo linaweza kuathiri maisha yao katika klabu mpya wanazokwenda kuzitumikia
"Safari hii hatutaweka taarifa za wachezaji tunaoachana nao kwenye mitandao ya kijamii kwa kuwa tumebaini taarifa hizo hupokelewa kwa hisia tofauti na mashabiki"
"Wapo baadhi ya mashabiki wanaandika komenti mbaya ambazo huwavunja moyo wachezaji na pia komenti hizo zinaweza kuwaathiri huko wanakoelekea"
"Tutatoa taarifa zao kwa sababu tunafahamu Wanachama wetu wana haki ya kufahamu walioondoka, lakini tutatumia utaratibu wa kiungwana"
"Taarifa ya kuachana na mchezaji sio taarifa ambayo unahitaji kuitangaza kwa lengo la kunufaika kibiashara," alisema Kamwe
Yanga huenda itatoa taarifa moja kuhusu wachezaji wote ambao hawatakuwa sehemu ya kikosi msimu ujao
