Mshambuliaji wa zamani wa Azam Fc Prince Dube amesema atahakikisha anajipanga ili kuthibitisha ubora wake pale atakapoanza kuitumikia timu yake mpya
Dube kwa sasa ni mchezaji huru baada ya kutimiza masharti ya kuilipa Azam Fc gharama za mkataba mpya ambao alipaswa kusaini
Dube yuko nchini akisubiri kutambulishwa katika timu yake mpya, Yanga ikitajwa kumalizana na mshambuliaji huyo kutoka Zimbabwe
"Kwanza namshukuru Mungu sana kwa jambo hili kumalizika salama, nilikuwa nasubiri kwa muda mrefu na kwa hamu uamuzi huu. Nawashukuru Azam kwa kukubaliana na ombi langu," Dube alinukuliwa na gazeti la Mwanaspoti
"Ni miezi minne sasa niko nje ya uwanja, ukweli ni kwamba nina hamu sana ya kurudi kucheza soka la ushindani:
"Unapozoea kucheza soka na ikawa tofauti ukiwa huna matatizo yoyote ya afya ilikuwa inaniumiza sana, lakini kwa sasa mambo yamekwisha. Kinachofuata ni kujipanga tu, nataka kujiandaa vizuri ili nitakaporudi nithibitishe uwezo wangu," alisema
Dube aliifungia Azam Fc mabao nane katika msimu uliopita Ligi Kuu ya NBC kabla ya kuikacha timu hiyo mwishoni mwa mwezi Februari
Yanga tayari imempa mkataba wa miaka miwili kinachosubiriwa ni taratibu za utambulisho ambao huenda ukafanyika wiki hii
Dube ataungana na washambuliaji wengine katika kikosi cha Yanga ambao ni Kennedy Musonda na Clement Mzize huku kukiwa na tetesi kuwa Yanga pia imemsajili Jonathan Sowah raia wa Ghana aliyekuwa akiitumikia Al Nasri ya Libya
