Baada ya kufanikiwa kutetea mataji mawili ya Ligi Kuu na Kombe la Shirikisho la CRDB, Yanga imepania kufanya maboresho zaidi ili kuhakikisha inaendeleza ubabe katika soka la ndani na kufanya vizuri zaidi katika mashindano ya kimataifa ya Ligi ya Mabingwa Afrika msimu ujao
Kwa msimu wa tatu mfululizo, Yanga ni bingwa wa ligi kuu na itaiwakilisha Tanzania kwenye michuano ya Ligi ya Mabingwa Afrika
Msimu uliomalizika, Yanga ilitolewa katika mashindano hayo yanayoandaliwa na Shirikisho la Soka Afrika (CAF) na Mamelodi Sundowns ya Afrika Kusini kwenye hatua ya robo fainali
Meneja wa Habari na Mawasiliano, Ally Kamwe, amesema kutakuwa na maboresho muhimu katika kila idara ili wafanye vizuri katika mashindano yote watakayoshiriki 2024/25
Kamwe alisema wanafahamu mashindano hayo ya ngazi ya vilabu Afrika ni magumu, hivyo hawataki 'kuishia' tena njiani na wanataka kuipa heshima Tanzania
"Kila msimu tunakuwa na malengo yetu, tunapanga vizuri kwa ajili ya Ligi ya Mabingwa Afrika, tunataka kufanya vizuri zaidi, tunataka kuonyesha hatukufanya vizuri msimu uliopita kwa bahati mbaya"
"Mchezaji ambaye Yanga tunamhitaji hatutamwacha, lakini tutaboresha kikosi chetu kwa mapendekezo ya kocha wetu, tunataka kuwa na Yanga tishio zaidi ya hii, Wana-Yanga watafurahi msimu ujao," alisema Kamwe
Baada ya msimu kufika tamati, wachezaji wanatarajiwa kupewa mapumziko ya mwezi mzima wakitarajiwa kurejea mwanzoni mwa mezi Julai tayari kuanza maandalizi ya 2024/25
