Kocha Mkuu wa Yanga Miguel Gamondi amesema kikosi chake hakikupata muda wa kutosha kufanya maandalizi ya mchezo wa Ligi Kuu dhidi ya Dodoma Jiji kutokana na kukabiliwa na mechi mfululizo
Hata hivyo Gamondi amesema watakuwa tayari kwa mchezo huo wa raundi ya 28 ambao utapigwa kesho Jumatano katika uwanja wa Jamhuri
Akizungumza katika Mkutano na wanahabari kuelekea mchezo huo, Gamondi ameesema baada ya mazoezi ya mwisho watakayofanya leo, atafahamu wachezaji ambao watakuwa tayari kwa mchezo huo
Gamondi amedokeza atawapa nafasi baadhi ya wachezaji ambao hawakutumika sana tangu mwanzo wa msimu huu
"Ratiba yetu ni changamoto hivyo siwezi kusema kama tumepata muda wa kutosha kujiandaa na mchezo huu. Lakini niseme tu, tuko tayari kwa ajili ya mchezo, nina kundi la wachezaji ambao wamepambana katika changamoto zote tangu mwanzo wa msimu"
"Jioni tutapata nafasi ya kufanya mazoezi ya mwisho, baada ya mazoezi hayo nitafahamu ni wachezaji gani ambao watakuwa tayari kwa mchezo"
"Lakini hii ni mechi ambayo tutacheza pasipo kuwa na presha yoyote, nitatoa nafasi kwa baadhi ya wachezaji ambao hawakutumika sana tangu msimu huu ulipoanza"
"Naamini hii ni nafasi nzuri kwao kudhihrisha ubora wao na kuonyesha bado wanastahili kuendelea kucheza hapa," alisema Gamondi
